Ein peran í eldhúsinu sprakk í gær þegar ég opnaði ísskápinn. Þetta fékk mig til að pæla aðeins í eðlisfræði. Ég fór að grafa aðeins í gamla menntaskóladótinu mínu og fann gömlu eðlisfræðibókina frá því í öðrum bekk. Ég gluggaði aðeins í hana en sofnaði í hægindastólnum í stofunni og þegar ég vaknaði var komin nótt svo ég fór að sofa aftur.

Ég þurfti svo að fara í búð í dag, ekkert að borða. Það er víst ekki til Orange Cheerios nema bara á amerískum dögum - komst að því eftir hálftíma rugl í afgreiðslufólkinu og verslunarstjóranum. Ég sagði þeim að það væri til í hverri einustu Wal-Mart verslun í Bandaríkjunum og að það væri skrítið að þau væru ekki með þetta. Er það bara ég eða eru allar verslanir hérna á landi með óhæft starfsfólk? Ég fer ekki í þessa verslun aftur.

Ég rakst þó á gamlan bekkjarfélaga minn úr Torfholtsskóla sem ég hef ekki séð í mörg ár. Hann virtist ekki vilja að ég myndi búa til heimasíðu fyrir hann þrátt fyrir að hann ætti enga. Hann er víst að vinna sem einhverskonar ráðgjafi hjá borginni. Ekki merkilegasta starf í heimi ef þú spyrð mig. Ekki græt ég að þurfa ekki að standa í heimasíðugerð fyrir hann.

Over and out,
Grímur

Ég var á labbinu í íbúðinni þegar ég tók eftir því að einhverskonar svartur hlutur stóð út undan þvottavélinni. Ég ætlaði að spyrja Efraim hvað hann héldi að þetta væri en hann svaraði ekki þannig að ég tékkaði sjálfur á þessu. Það kemur í ljós að þetta var bara TridemConnect snúran sem ég týndi um árið, fínt að finna hana aftur. Ég ætlaði einmitt að athuga hvort það væri ekki hægt að tengja saman gamla Tridem örbylgjurafalinn við nýja viðvörunarkerfið á tölvunni minni. Maður getur aldrei verið of varkár.

Annars skil ég ekkert af hverju það er ekki hægt að nota USF netstaðalinn til að skrifa færslurnar á þessari bloggsíðu, hann er líklega útbreiddasti United Stodrinov staðallinn á vesturlöndum (allaveganna segir Rasmus mér það). Ég sendi póst á vefstjórnina síðasta fimmtudag og hef ekki fengið neitt svar ennþá, kannski er það útaf helgarfríi starfsmanna. Mér finnst allaveganna fáránlegt að nota HTML, það er líklega eitt óhreinasta tungumálið af þeim öllum.

Það er kominn 9. janúar og samt eru atvinnuleysisbæturnar ekki komnar, ég er að bíða eftir þeim svo ég geti fjárfest í Hanna-Barbera safninu á Betamax spólum (já, þið heyrðuð rétt, upprunalegu Betamax útgáfurnar sem voru bara framleiddar í 150.000 eintökum). Það er einhver fábjáni að selja þetta á netinu á bara 1500 dollara, mamma var búin að samþykkja að borga það sem vantar uppá. Alveg ótrúlegt hvað fólk er tilbúið til að láta þetta frá sér á lágu verði, þessi infamous_ink hlýtur að vera eitthvað peningaþurfi. Allir á IMDb spjallborðinu eru sammála mér um að þetta sé að minnsta kosti 4000 dollara virði svo ég verð að teljast lukkunar pamfíll.

Over and out,
Grímur

Ég gerði voða lítið í dag. Litli kötturinn sem kemur oft í heimsókn birtist ekkert í dyrunum í dag, þrátt fyrir að ég hafi sett út skál af brauði og mjólk. Ég beið ábyggilega í tvo klukkutíma með borðtenniskúlu sem ég ætlaði að grallast í kettinum með. Ég var þó ekki alveg aðgerðarlaus í biðinni, ég segi það ekki. Ég hlustaði á rokkland á Rás 2 á meðan og heyrði tvö góð lög með Nirvana og The Cardigans.

Reyndar spjallaði ég aðeins við tyrkneska vin minn, Efraim, á Skype. Hann sagði allt gott að frétta en hafði ekki mikinn tíma til að spjalla eins og reyndar dálítið oft uppá síðkastið. Hann er víst búinn að eignast einhverja konu og það er barn á leiðinni. Ég vona bara að það skemmi ekki fyrir verkefnið með gagnagrunnana sem við ætluðum að vinna saman, ég hef lengi hlakkað til að klára það og koma því út á internetið. Ég er reyndar eiginlega alveg viss um að konan hans komi í veg fyrir velgengni hans og ég er búinn að senda tölvupóst á hann þess efnis og bíð eftir svari.

Ég var líka að rífast við einhverja bjána á disney-spjallborðinu sem héldu því fram að Trinesco útgáfurnar af Andrésar Andar leikföngunum frá 1949 væru verðminni en þær sem kæmu beint frá Mattel sem er auðvitað ekki rétt. Það er svosem skiljanlegt að þeir sem vita ekki mikið um efnið draga þessar ályktanir og ég benti ducky_luck og underworld521 á það en þeir vildu ekkert hlusta. Ég hringdi í Efraim á Skype og hann sagðist vera sammála mér eftir að ég útskýrði málið fyrir honum en hann sagðist svo þurfa að fara að slá lóðina svo við kvöddumst í bili.

Á morgun ætla ég að kíkja á infra-tycoon.com, ég hef heyrt góða hluti um þann vef. Mér skilst að þeir viti sínu viti þegar kemur að samanburði á steinsteyputegundum og leggi áherslu á það sem skiptir máli; blýmagn og karbónatstig. Það eru nefnilega ekki bara rannsóknirnar sem eru áhugaverðar heldur líka þessi samanburður. Ég fékk áhuga á þessu öllu saman þegar ég kynntist Rasmus Jordvik í gegnum Skype, en hann er víst stórt nafn í þessum bransa. Ég er búinn að bjóðast til að búa til heimasíðu fyrir hann og hann er hugsa málið.

Over and out,
Grímur